Ертегілер әлеміне құштар, ізгілікке сенетін кез келген адам Қуыршақ театрының билеттерін алуға асығады. Мұнда адамның жасына қатысты шектеу жоқ. Театрға келуші әр қойылымнан өзі іздеген жан тыныштығын табады, ерекше көңіл күйге бөленеді! Балалар әлемі ең көңілді, ең шынайы әлем! Ал қоғам осындай тазалыққа құштар!

«Ұр, тоқпақ!» – қуыршақ театрында

26 Қаңтар 2023

Талай жылдан бері қуыршақ ойнап, балдырғандарды қуантып жүрген Алматы Мемлекеттік қуыршақ театры жас жеткіншектерге халық ертегісінің желісімен сахналанған «Ұр, тоқпақ!» қойылымының премьерасын ұсынды.

Жақсылық пен жаман­дықтың, адал­дық пен арам­дықтың аражігін айқын­дай­тын бұл спектакльде аңғал да сенгіш, ақкөңіл де мейірімді ақсақал қошақанын іздеп жүріп, тұзаққа түскен қазды құтқарып қалатынын бәріміз жатқа білеміз. Қарапайым қазды емес, таң­ғажайып данышпан Қазбайды құт­қарған ақсақал мен кемпірінің өмі­ріне сол сәттен бастап үлкен өзгеріс енеді. Қаз­бай қарияға алғыс айтып, «Піс қазан», «Құс есек» пен «Ұр, тоқпақ» ат­ты ерекше сиқырлы сый­лықтар ұсын­ға­нымен, жез­тырнақтар түрлі адам кей­піне еніп, сыйлықтарын тар­тып алу­ға талпынады. Деген­мен әділдік же­ңіп, ақсақал өз мақсатына жетеді.

Ұлттық дәстүрмен ұтым­ды безен­ді­ріліп, әуезді әнмен, көңілді бимен әр­ленген ер­тегі – кішкентай көрер­мен­­дер­ге қызықты көңіл күй сыйлап қана қой­май, бала санасының дамуы мен рухани, адамгершілік қасиеттерін бойына сіңі­ріп, тіл ал­ғыш­тыққа, тәртіп­ті­лікке, шын­шылдық пен үл­кенге құрмет көр­сетуге үн­дейді.

Қойылымның инсценировка авторы – ақын Қа­сымхан Бегманов. Спек­­такльдің суретшісі – Ал­ты­­най Жү­сіпәлі. Қойы­лым­­­ды музыкамен көр­­кем­­дегендер – Бақберген Бай­­­шы­ғаш пен Аршын Жол­дасхан. Туын­дыны режиссер Еркебұлан Қаб­дыл сах­налаған. Айта кетейік, ол бұған дейін қазақы салт-дәстүр мен батыр­лықты көр­сететін «Ер Төстік», жас­өс­пі­­рімдерге арналған, қазақ валь­сінің королі Шәмші Қал­даяқовтың ән­дер топтама­сынан сахналанған «Өмір-өзен», жолда жүру ережесі мен дос­тықты дәріптейтін «Ауыл иті Ақ­бай» атты кө­рер­мен сұранысына ие шы­ғар­маларды қойған.

Маршан ӘБІШ

"Егемен Қазақстан" газеті

Сілтеме: https://egemen.kz/article/333738-ur-toqpaq!-–-quyrshaq-teatrynda