Ажырасуы көбейіп, бақытты жұбы кеміп бара жатқан бүгінгі қоғамда зәрулігі байқалып отырған бір қажеттілік – отбасылық құндылықтарды дәріптеу. Бұл мақсаттың жолында жарасымды отбасылық өмірді, бақытты шаңырақтардың орны мен неке мәртебесін биіктете түсуге бағытталған «Мерейлі отбасы», «Бақытты отбасы» сияқты байқауларды жиі ұйымдастыру үлгісі үрдіске айналып келе жатқаны қуантады. Өзіндік «менін» жоғалтпай, өнерін өрге жүздіріп, кәсібін көркейтіп, балаларын да аман-есен өсіріп, айналасына өнеге болып жүрген бақытты жұптарды насихаттау неке беріктігін арттыра түсу жолындағы игі қадамдардың бірі.
Алматы мемлекеттік қуыршақ театрында киелі өнер табыстырып, өмірде де қол ұстасып қатар келе жатқан 11 отбасы бар. 30 актері бар шағын ұжым үшін аз емес. Қуыршақтарды қимылдатып, бала дауысымен неше түрлі жан-жануарлар мен құстардың үнін, мінезін салып әндетіп, билетіп жүрген актерлік өнердің ауыр салмағы мен қызықты жұмысына бас сұққан ерлі-зайыптылар өз шаңырағында да берекесі тасыған, бірлігі берік жұп екенін «Бақытты отбасы» театрішілік байқауында бар қырынан дәлелдей түсті. Театрға келген әр баланың жүрегіне терең үңіліп, сезім пернесін тап баса алатын талантты әртістердің төрт жұбы өз балаларымен бірге топ құрып, отбасылық сайыс көрігін қыздырғанда, театрдағы әріптестері бірдей жанкүйерлік жасап, ортақ жеңіс тіледі. Сайысқа түскендердің жас ерекшелігі де, отбасылық құрамы да әртүрлі: Момынжановтар төрт баланың ата-анасы болса, жаңадан шаңырақ көтерген Жолдасхановтардың бөбегі бесіктен белін енді көтерген. Отбасы тәрбиесіндегі қағидаларды негізге ала отырып, келешек ұрпаққа мардымды тәрбие беруді мақсат еткен жеті бөлімнен тұратын сайыста бақ сынаған өнерлі жұптар өз ұжымы алдында жаңа қырларымен танылып қана қоймай, байқау қорытындысында қомақты қаржылай сыйлықтарды да олжалады.
«Бақытты отбасы» сайысының 3-орнын белгілі театр әртістері Болат және Ұлбосын Момынжановтар отбасы иеленді. Көрерменін харизмаға толы би мен ерекше идеямен ойластырылған бейнежазбаларымен баурап алған үлгілі отбасы ынтымақтарының беріктігін көрсетті. Байқаудың жүлделі 2-орнын театрдың дыбыс инженері Аршын және театр актрисасы Гүлбаршын Жолдасхановтардың отбасына бұйырды. Көрермендер мен қонақтарды тартымды таныстыруымен, жалындарымен тәнті еткен үйелмен көрермендер көзайымына айналып үлгерді. Сайыстың жүлделі 1-орнына театр әртісі Шоқан мен «Көрермендермен жұмыс» бөлімінің қызметкері Жұлдыз Құлназаровтар ие болды. Әсерге толы биімен, ерекше ойын үлгілерімен көзге түсіп сайыстың көрігін қыздыра түсті. Ал «Бақытты отбасы - 2019» театрішілік байқауының бас жүлдесіне театрдың белді әртістері, үлгілі жұптардың бірегейі Алтай және Марал Тәуекеловтердің әулеті лайық деп танылды. Отбасыларын таныстыру талабын өз мамандықтарымен байланысты етіп дайындаған бейнетуындылары көпшіліктің таңданысын тудырып, отбасының ауызбіршілігін, бір-біріне деген сезімдерінің кіршіксіз тазалығын керемет көріністермен баяндап берді.
Алматы мемлекеттік қуыршақ театрының директоры Талғат Қамқабайұлы «құндылықтар құлдыраған қоғамда бақытты отбасыларды үлгі етіп көрсету, өнер мен өмірді ұштастырып жүрген отбасыларды насихаттау – әлеуметтік дерттің алдын алу жолындағы тиімді тәсіл» деген пікір білдірді. Ұлттың болмысын биіктетіп, ұрпақтың қажетіне жарайтын осындай тәрбиелік шаралар барлық жерде жалғасын табуға әбден лайықты.